Thursday, July 14, 2011

හිරු දැවී

හිරු දැවී සඳු ගිලී
කප් කෙළක් තරු නිවී
අඳුරු විය විමානය
හුදෙකලා මග නොමග
පැටලිලා තනිවෙලා
හිරු ලෙසින් සඳු ලෙසින්
එකලු කල මැන
මහද සෙනෙහසින් . . .

සිටු මැදුරු යස ඉසුරු
පිරුණු ලොවකට - මහරු
කදෝපැණියෙක්මි මා
ඇඳිරියේ
කෙලෙස නම් එලිය දෙම්
කුමරියේ . . .

කතරකට පිණිබිඳකි
කුමුදකට පුරසඳකි
මතකයෙන් ගිලිහිලා
කුමරියේ
හිරු දැවෙයි සඳු ගිලෙයි
මගෙ ලොවේ
එළිය දෙමි කෙලෙස නම්
එකළු කල මැන
මහද සෙනෙහසින් . . .


ගායනය: ආචාර්ය අමරදෙව සහ විශාරද නන්දා මාලිනී
සංගීතය: රෝහණ වීරසිංහ
ටෙලිය: අවසඳ (1990)


ඇය ධනවත් සිටු පවුලක උගත් තරුණියකි. සිය දෙමාපියන්ට නොපිහිටි රැඩිකල් ගති ඈ සතු විය. එනිසාම ඇගේ සරසවි පෙම්වතා ඇගේ දෙමාපියන් අණින් "අතුරුදහන්" කෙරවෙයි. ඉන් පසු ඇය ගෙවන්නේ උමතු තත්වයකට ආසන්න දිවියකි. ඔහු උපාධිධරයෙකි. විරැකියාවෙන් ඇති වූ ජීවන බර උසුලා ගත නොහී හෙතෙම රියැදුරකු ලෙස රැකියාව කරන්නේය. ඔහු ඇයගේ රියැදුරා වෙයි. මොවුන් අතර ඇති වන සංකීර්ණ සම්බන්ධතාවයත්, ඇගේ දෙමාපියන් එය අසම්මත පෙමකැයි වටහා ගැන්මත්, 1990 මුල් භාගයේ පුංචි තිරයට එක් වූ අවසඳ ටෙලි වෘතාන්තයට පාදක විය. දැන් ඇති මෙලෝ රහක් නැති ටෙලි නාට්‍ය මෙන් නොව එකල තිරගත නාට්‍ය ඉතාම තියුණු තේමාවන් රැගත් ඒවා විය. හිරු දැවී ගීතය මේ නාට්‍යයේ තේමා ගීතය වන අතර, මුළු නාට්‍යයම එම ගීතය තුලට කැට කර ඇතැයි කීම අතිශයෝක්තියක් නොවේ. 
ඇගෙ ලොව අඳුරු වී ඇත. ඒ හිරු දැවී ගොස් සඳු ගිලී යාමෙන් නොනැවතී අසංඛ්‍ය වූ තරු ද නිවී යාමෙනි. හිරු වැසී නැත, ඇත්තේ දැවී විනාශ වීය. සඳු ද වැසී නැත. එය යළි ගොඩ නො එන්නට ගිලී ගොස් ය. එ මගින් මේ ඇගේ සිතෙහි ඇති වන පාළුව පිලිබඳ වූ දැඩි භාවයන් ප්‍රකාශ කෙරෙයි. ඔහු නැතිව යාමෙන් විමානය අඳුරු වී ඇය මග නොමග හඳුනා ගැනීමට නොහැකී වල්මත්ව ඇත. ඇය වල්මත්ව ඇත්තේ පුහු ආටෝපය නම් වනයේය. ඔහුට හිරු සඳු වී ඇයගේ එළිය කරන්නට ඇය ඇරැයුම් කරයි. එ නමුත්, ඔහු සිය තත්වය මනාව තේරුම් ගත් අයෙකි. මේ යස ඉසුරෙන් පිරුණු ලොවට ඔහුගේ එළිය කදෝපැනියකු හා සමානය. එනිසා ලොවට එළිය දෙන්නට කෙරෙන ඇගේ ඇරැයුම් නිසරු එකක් බව ඔහු පවසයි. ඇයට අනුව ඔහු කුමුදකට පුරසඳක් මෙන්ය. එනම් ඔහු දැකීමෙන් ඇය ප්‍රමුදිත වෙයි. නමුත් ඔහුට අනුව ඔහු කතරකට පිණි බිඳුවකි. කතර තෙත් කිරීමට එය නොසෑහෙන අතර නිරුදක කතර හා ගැටුණු සැනින් පිණි බිඳුව මිය යයි. එනිසා හිරු දැවෙන, සඳු ගිලෙන ඇගේ ලොව එළිය කිරීම ඔහුට කළ නොහැක්කකි. 
මේ ගීය පුරාම දිවෙන භාවයන් එහි වචන මගින් මනාවට විස්තර වේ. පංති ගැටුම හා ආදරය ගැන මනා කියැවීමක් මේ ගීතයෙන් ලැබේ. එසේම ශ්‍රී ලාංකික යුග ගීත ඉතිහාසයේ උච්චස්ථානය ලෙස මේ ගීතය සැලකීමටද මම පසුබට නොවෙමි. තනුව හා සංගීතය වඩාත් හොඳ වූ ගීත තිබිය හැකිය. එනමුත් භාවයන් දැනවීම අතින් හා පද රචනය අතින් නම් කිසිදු යුග ගීයකට මේ හා ලං වීමටවත් නොහැකි වන තරමටම මේ ගීය සාරවත්ය. ගීය පුරාම අසන්නාට දැනෙන්නේ මෙවන් පුවතකට පිළිණ දෙන අයෙකු වීමට සිදු වීමේ කාළකණ්නි කමේ හැඟීමයි. කිසිදා විසඳිය නොහැකි ප්‍රහේළිකාවක අසන්නා මෙ ගීතය විසින් අතරමං කර දැමෙන අතර, එමගින් තැනෙන භාවමය අගාධය තුල තමා ඇත්තේ කොතනැදැයි සෙවීමට අසන්නාව මේ ගීතය තුලින් දිරි ගන්වයි. අසා බලන්න, මෙය හෙළ යුග ගීයේ සිළුමිණයි.

16 comments:

Anonymous said...

medeafire/Diveshare file විදියට දෙන්නකො. අරකෙන් ගන්න බෑනෙ ලොග් වෙන්න කියනව පාස්වර්ඩ් ඉල්ලනව. හැමෝටම ගන්න පුඵවන් විදියට දෙනවනම් හරිම වටිනව මිත්‍රය.

මිගාර said...

ඔබ කියන ප්‍රශ්නය මටද වැටහේ. නමුත් මීඩියාෆයර්, රැපිඩ්ශෙයාර් වැනි අඩවි වලට උපරිගත කරන ගීත කෙටි කලකින්ම මැකී යයි. එළකිරි අඩවියේ එසේ සිදු නොවේ. එසේම ඔබට එළ කිරි අඩවියේ ලියාපදිංචි වීමට අවශ්‍ය ඊ-ලිපිනයක් පමණකි. කෙසේ වුවත් මේ ක්‍රම දෙකටම මින්පසුව ගීත උපරිගත කරන්නෙමි.

ෆැන්ටසි said...

බොහොම අගේ ඇති වැඩක්.අපි නොවරදින රසිකයන් ලෙස හැම ලිපියක් හා එකතු වේවි....බොහොම ස්තුතියි වැදගත් පියවරට...

hare :-) said...

මීඩියාෆයර් වල නම් මැකෙන්නෙ නෑ.. මම හිතන්නෙ දැනට එහෙම ‍දත්ත නොමකන සහ වදයක් නැතිව බාගන්න පුළුවන් එකම අඩවිය ඒක...

කොහොමින් හරි මේ සින්දුව දීපු එකට නම් ස්තූතියි උපරිමෙන්ම!

hare :-) said...

අනේ මහත්තයෝ.. මේක බාන්න ගියාම රටේ නැති ප්‍රශ්ණ අහනවා. ඇහැක්නං මීඩියාගින්නට දාල දෙන්න. මොකද හෙන කාලයක් තිස්සෙ හොයාපු එකක්!

කතන්දර Kathandara said...

ඌණ පූර්ණයක්

අවසඳ ටෙලිය අවසාන වීමට පෙර තහනම් කරන ලදී. මෙය සෝමරත්න ගේ ටෙලියකි. පද රචනයද ඔහු විය යුතුයි.

තහනම් කළ පසු Media Minister ඒජේ රණසිංහ හෙවත් සෙරෙප්පු සුපා කීවේ එය අවසඳක් නොව නවගඳක් බවයි.

මිගාර said...

සෝමරත්න (දිසානයක?) දන් සිටිනුයේ පාලනය හා එක්වය. එනිසා මේ ටෙලිය නැවත වරක් පුංචි තිරයෙන් දකින්නට හැකි වේවා යයි පතමි.

Anonymous said...

wonderful song! but it's unable to download even if I have an account. could you please do something?

thanks again.

/pramod

මිගාර said...

Try this out. Once again you need an account.

http://www.seegiri.com/forum/downloads.php?do=file&id=315

Try this too

http://filetram.com/download/mediafire/audio/8885520484/amaradeva-nanda-malini-hiru-dawi-awasanda-theme-mp3

Anonymous said...

It's working. Thanks a lot. I was searching for this song for years. I watched this tele-drama when I was 14,15 years old. Thanks again

/Pramod

ලකී සිරි said...

මට මතකයි මේ ටෙලිය...අර ගෝතමී පතිරාජ ඩග්ලස් රණසිංහ ඇඟේ දාඩිය පිහ දාන අසභ්‍ය දර්ශනයක් තිබුනා කියලා ඒ ජේ ඇමති තහනම් කරපු එක නේද....
ලස්සන සිංදුව..ආයෙත් අහන්න ලැබුන එක ගැන සතුටුයි..

ජීවිතේ මල් said...

ගී රස විනිස දැන හඳුනා ගොඩක් කල්ය... මේ ගීය මාත් සෙවුවකි. සීගිරි ඩොට් කෝම් එකෙන් බාන්නට නොහෑකිව ලත වෙමි... අහෝ...

අද මට ප්‍රීතිමත් දවසකි. කාලෙකට පසු 'සෑබෑ' බ්ලොග් පෝස්ට් එකක් කියෙව්වෙමි....

මිනිසෙකුගේ මුවින් ගිලිහෙන සෑබෑ රසවින්දනාත්මක රචනාවක් කියවීම ඈත්තම කියනවා නම් කතරකට 'පිණි බිඳකි' ඒත් ඔක්කොම පෝස්ට් කියෙව්වාම ඒක 'දිය කඳක්' වෙනු ඇත. ස්තූතියි..... බොහොමත්ම...

Nadeesha chandrasena said...

//හිරු ලෙසින් සඳු ලෙසින්
එකලු කල මැන
මහද සෙනෙහසින් . . .// මේ ගීතය ඇහෙන කොට මට වයස අවුරුදු අටයි.අටේදි දැනුන හඟීම මයි විසිඅටේදි දැනුනෙත්.අවසඳත් එක්ක මහමෙර පාමුළත් තහනම් කළා.ඒත් ඒ නිර්මාණ අදටත් බොහෝ දෙනෙකුට මතකයි.නන්දා මේ ගීය ගයන හඬ,ගෝතමී පතිරාජගේ රංගනය යන දෙකම එකකට එකක් පරයා නැගුනා.ටෙලි නාට්‍යගීතයක් මේ තරම් අරුත්බරව ඇහෙන්නේ නැහැ දැන්! අවසඳට පස්සේ ඉටි පහන් වලින් ඇහුනා (ඉටි පහනක් දෝමා..නිවිනිවි දැවෙනා..) ඊට පස්සේ දඬුබස්නාමානය (රකිනා දිවි සිහ වග වැළහින්නේ)..දැන් නම් ඇහෙන්නෙම නෑ.මේ සත්කාරයට "බඩා මාමාට" පිං.

oshadha said...

කදෝපැනියකු යන්නෙහි අරුත සහ කුමුදක් යන්නෙහි අරුත සදහන් කරන්නේ නම් මැනවි

Anonymous said...

කදෝපැනියකු - කණාමැදිරියා
කුමුදක් - කුමුදු මලක්

-චින්වි

Oshadha said...

චින්වි, ඔබට ඉස්තුතී !!