Sunday, March 21, 2010

කොත්තිලාක්කු පහන


කොත්තිලාක්කු පහන තිබේ පෙට්ටගමක් යට
කුප්පි ලාම්පුව හිමිවී ඇත මුළුතැන්ගෙට
අලුත ගෙනා ලාම්පුවේ එළිය දකිනවිට
අයියණ්ඩිගෙ සිතට සතුට වැඩිවේ හරියට

රෑ නිදිමත එනතුරු පෙර කතා අහන්නට
ඉතින් ඉඩක් නැහ අම්මගෙ දෙපසින් ඉන්නට
අඩක් ඉතිරි කළ අහරේ රහක් බලන්නට
පිනක් නැහැ වගේ අයියේ දැන් මේ නංගිට

ඉස්සර විදියට මගෙ අයියට සලකන්නට
නැති හින්දයි හේතුව මේ හැටි දුක් වන්නට
දොසක් කියන්නේ නැහැ මම මගෙ නෑනන්ඩිට
වෙනස් කමක් කරන්න එපා කවදාවත් මට

ගායනය - නිරංජලා සරෝජිනී
 

ජීවිතයේ විවිධ කාලයන්න්හීදී අපට විවිධ අත්දැකීම් වලට මුහුණ දීමට සිදුවේ. පවුලක් තුල ඇති ස්ථානය ඉන් එකකි. කලින් පවුලක් තුල සිටි වැදගත් පුද්ගලයන් කාලානුරූපීව නොවැදගත් බවට පත් විය හැකිය. මේ සනාතන සත්‍යය, මෙම ගීය තුලින් මනාව විස්තර කර දෙයි.

කොත්තිලාක්කු පහන එනම් පොල්තෙල් පහන පැරණිය. එහි එළිය අඩුය. එය වඩාත් නවීන කුප්පි ලාම්පුවෙන් ආදේශනය වී ඇත. මේ අතර තවත් එළිය වැඩි ලාම්පුවක් ගෙනා විට කුප්පි ලාම්පුවද එළිය දෙන උපකරණ වල වැදගත් කමින් අඩු එකක් බවට පත් වේ. පහන උපමා රූපකයක් ලෙස යොදා ගනිමින් රචකයා ගැඹුරු විවරණයක් ජීවිතය ගැන සිදු කරයි.

පොල්තෙල් පහණ දැන් ඇත්තේ පෙට්ටගම යටය. එනම් කිසිම වැදගැම්මකට නැති තැනක එය ත්බා ඇත. තවදුරටත් එයින් ප්‍රයෝජනද නැත. කොත්තිලාක්කු පහන යනු ආච්චී ය. ඇය මිය ගොස් හො ඔත්පලව සිටිනවා විය හැකියි. මෙතරම් කල සාලයට එළිය ලබා දුන්නේ කුප්පි ලාම්පුවයි. එමෙන්ම මෙතෙක් කල් පවුලට එලිය ලබා දුන්නේ මවයි. නමුත් නව ලේලිය (අලුත් ලාම්පුව) විසින් ඇය කුස්සිය වෙත තල්ලු කර ඇත. එමෙන්ම සියළු දෙනා කතා වන්නේත් මේ අළුත් ලාම්පුව ගැන මිස පරණ ලාම්පු ගැන නොවේ. මේ නැගණිය පෙර පරිදි සිය සොයුරා සමග කල් ගෙවීමට නොහැකියාවෙන් දුක් වන්නීය. එමෙන්ම ඇය පවුලෙන් කොන්වී යාදැයි බියද ඇය සමීපයේ පවතියි. කුප්පි ලාම්පු එළියේ මවගේ දෙපසින් සිට කතා අහන්නට, අඩක් ඉතුරු කළ බත් පතේ රස බලන්නට ආදියට දැන් ඇයට ඉඩක් නැත. එතැන දැන් අයියාගේ බිරිඳ විසින් සොරා ගෙන ඇත.

සරල උදාහරණයක් උපමා රූපකයක් ලෙස භාවිත කරමින් සුවිසල් පණිවුඩයක් දෙන මෙවන් ගී අතිශයින්ම අගය කළ යුතු වන්නේය.

11 comments:

තිස්ස දොඩන්ගොඩ said...

මම කැමතිම ගීයක්...හැබෑටම ඔය කොත්තිලාක්කු කියන එකේ තෙරුම නොදැන හිටියේ මෙච්චරකල්...බොහොම ස්තූතියි....
බ්ලොග් එකේ නව පෙනුමත් මනෝ රම්‍යයි...

Nimesh said...

ලස්සන සිංදුවක්

මිගාර said...

ඔබේ පිළිතුරු වලට බොහොම තුති

චතුරංග රූපසිංහ said...

නැවත පැමිනීම ගැන සතුටුයි

විශ්මි said...

මෙච්චර දවස් මේකෙ මුල් පදය හොයගන්න බැරුවයි හිටියෙ..... අපූරුවට පැහැදිලි කරල තියෙනව ගීතයම..... ස්තුතියි........

Anonymous said...

ආව්විගෙ රෙද්ද......

Anonymous said...

This song is NOT about Achchi" Grand mother"..This says what happens to younger sister (Nangi) when elder brother (Aiya) marry a women...
Then all will talk about new bride(manamali) and forget the younger sister (Nangi).. So Kotti lakku pahana is the younger sister(Nangi)

Anonymous said...

ඇනෝ...! "ආච්චිගේ රෙද්දෙන් " වත් විලිවහගෙන සින්දුවක් රස විඳින්න ඉගෙන ගනින්... අඩු ගනනේ අලුත් වචනයක් වත් ඉගෙන ගනින්....

Anonymous said...

සිංදුවහරියාකාරව කියා දුන්නාට බොහොම ස්තූතියි

බිමල් සමන්ත කොඩිකාර said...

අදහස් දක්වන්න සැමට ම අවස්තාව තියෙනවා .එම අදහස් විවේචනය කරන්න එපා. ඒ අදහස් වලට ඇහුම්කන් දෙන්න .

Niranjan said...

කොත්තිලාක්කු පහන කියන වචනය ඇත්තට ම මම දැනගත්තේ මේ විස්තරය කියෙව්වට පස්සේ. මේ සිංදුව මට මුලින්ම ඇහුණේ කුප්පි ලාම්පු පහන කියලා. ඒත් කුප්පි ලාම්පුවක් ගැන වෙන ම කියන නිසා මේ නොතේරෙන වචනය මොකක්ද කියලා හොයා ගන්න බැරිව හිටියේ. කොහොම හරි දැන් දැනගත්තා. ඔබට ස්තුතියි ඒ ගැන පැහැදිලි කළා ට. මේ පහන ගැන වැඩි විස්තර මම අන්තර්ජාලයේ හෙව්වත් මේ ගිීතය හැරුණා ම ඒ ගැන සඳහන් වෙන කිසිම තැනක් මුණගැසුණේ නැහැ.